احجيها طك بطك
و ع المكشوف
(((((((((( وبالجلفي حصراً )))))))))
تعرفون اليابان ؟
اي تعرفونها زين
ام الصناعات
والإختراعات
والنظام
ما يضحكون جثير
ولا يضربون ثريد
غداهم بالقوطية وهمه يمشون للشغل
والصناعة الزينة ها مو حي الله صناعة
مو تنك
ولا تلزيك مثل ربعنا ( اذا رادو يصنعون شي)
واذا نريد نصنع شي بس تجميع وتقليد ( انسخ والزك)
ولا مثل الصين اللي خرّبنا سمعتها احنا العرب
دزونا الرخيص واحنا نبيع ونمشّي بضاعتكم
ومو قُصَراً بالصين ولا بصناعتها
بس خلينا عجايزهم تصنّع بالبيوت اشياء ما يكدر يصنعها زلمنا الخشنة
وعلمناهم الغش والخداع
جانت الصين يدزولنا مسدسات للجهال ( ام الصجم )
وحكومتنا الرشيدة منعت المسدسات ام الصجم لأنها تخلي الواحد يكوول (أخ )
لازم كله مُذنّب ( حارك زارف )
و إصكع واجضع
وبدون ( أخ )
اشسوت الصين ؟
اجاهم باص من ربعنا
سووا رصاصات مطاطية وحطوها بس شكل ويا المسدسات على اساس انها مو ام الصجم
واذا ماتعرفون الصجم هو يعني الخرزات الزغار
والصين ما جذّبوا خبر سووها على مود تعبر المسدسات الحدود
والزود لربعنا
احنا جنا نحجي ع اليابان شودّانا للصين ؟
يلله ماكو فرق كلهم عيونهم عمص ويتشابهون
وكلهم صياني وجيجان جان جايجي
وعلى كولت مدري منو يكول واحدهم اذا راد يسمي ابنه يذب الطشت من السطح
وشيطلع صوت يسمي ابنه بيه
احنا وين جنا نسولف
يلله نرجع لليابان
( اي مو هيَ براس الفرع )
اي
الزبدة
اليابان اجتهم ( كفخة ) وحدة وصحّتهم وصارو أوادم
وبدو من الصفر ووصلو المليون
وأحنا شبعنا كفخات إلزكة إلزكة فوكه فوكه
وكلما وكفنا اجتنا كفخة جديدة
وبس نريد نلحك العرب ( مو الأجانب ) وماكو
اي شوكت نصحى؟
حتى الخبل مرات تجيه ضربه وحده تصحيه
اي هم لو مخابيل جان وحده من الضربات صحّتنا
ولا تنسون
اليابان ضربوها نووي
تعرفون شنو يعني نووي؟
يعني ننوي على كولت عجوز جيرانّا
تدرون ؟
مرات أفكر
أفكر بس
لو حرام واحد يفكر ؟
اكول لو العراقيين يدزون شكم عراقي كل فترة معايشة خارج البلد
لليابان او غيرها
يمعودين واحدنا يروح لسوريا لو للأردن وهي بصفنا مو بعيدة (شمرة صاروخ)
ويجي متصركع ويشوف الفرق ويعبالي نفسه وصل قمة الحضارة والما طلع بعده متخلف ، وحقّه ، مو شايف وشاف
ويجي يحجيلنا لكان وما لكان وبدك وما بدك
وخّر لا أبدّك بالشارع
لعد لو يروح لليابان ويشوف النظام والبشر شلون عايشين
عبالك بغير كوكب
(الي يسمعني يكول شبع تخامة هناك /// وآني الرطبة مو شايفها )
نرجع للمعايشة
مو مالت الجيش
لليابان
صورة من اليابان بالليل ( عدهم خط ثاني مدري سحب مولده)
بس خوفي ع اليابانيين والله لا يصيرون مثل حمدنا
سامعين سالفة حمدنا ؟
هسه شوّرطني وجبت طاريه
يابه اسولفلكم على سالفة حمدنا
هذا واحد عرُبي عنده فلوس
كال خلي أدز حمدنا للخارج يعيش ويدرس هناك ويتزوج وحده اجنبية تعلمه لغه وعادات الأجانب
بعد جم سنة سافر وراح يزور حمد
دك الباب طلعت مرة حمد الأجنبية
سألها ( ويرز همد؟ )
كالت ( حمدنا حدّر للسوك )
طرررررررررررر
مثل مالتنا اللي ببداية شارع ( بلا تشابيه)
سؤالي من بعد هالثريد الثردته
اليابان بكفخة وحده صحو
أحنا يا كفخة تصَحّـــينا ؟؟؟؟
وسلامة تسلمكم
وهم عليهم
الأحد 27 يناير 2019 - 4:08 من طرف نمر الحلاوي
» يـــارب
الإثنين 11 أبريل 2016 - 5:40 من طرف ندى
» ما الحب ؟؟
الإثنين 11 أبريل 2016 - 5:37 من طرف ندى
» السلام عليكم جميعا
الثلاثاء 22 ديسمبر 2015 - 11:41 من طرف ندى
» ميلاد القائم عجل الله فرجه الشريف
الأربعاء 3 يونيو 2015 - 19:43 من طرف ندى
» كل عام واجروحي ابخير
الأربعاء 8 أبريل 2015 - 12:26 من طرف ندى
» أضــــــــحـــــى مــــــــبـــاركــــــ
الثلاثاء 7 أكتوبر 2014 - 2:40 من طرف كاظم الناصري
» مرحبااا
الثلاثاء 12 أغسطس 2014 - 23:17 من طرف حوراء العراقية
» عيد سعيد عليكم احبتي
الخميس 7 أغسطس 2014 - 1:05 من طرف ندى
» التوت الازرق
الجمعة 25 يوليو 2014 - 21:51 من طرف عاشِــقة الليل
» الكيوي
الجمعة 25 يوليو 2014 - 21:47 من طرف عاشِــقة الليل
» الفراولة
الجمعة 25 يوليو 2014 - 21:41 من طرف عاشِــقة الليل
» الكمون بالليمون
الخميس 24 يوليو 2014 - 5:50 من طرف عاشِــقة الليل
» أنها الدنيا
الخميس 24 يوليو 2014 - 5:49 من طرف عاشِــقة الليل
» جوزيه مورينيو
الأربعاء 23 يوليو 2014 - 6:59 من طرف عاشِــقة الليل